Forberedelser
Finn fram det som skal vere «heliumpinnen». Hemmelegheita bak aktiviteten (som det er lurt å halde for seg sjølv) er at presset oppover kjem av at alle passar på å ha fingrane løfta nok til å røre pinnen. Dette presset frå alle saman skaper nok kraft til å heve pinnen i staden for å senke han.
Ei gruppe på 8–12 personar er optimalt. Det bør ikkje vere færre enn 6 eller fleire enn 14 deltakarar.
Utstyr
Ein «heliumpinne» er ei lang, tynn og lett stong. Det lettaste å få tak i er eit kosteskaft eller ei teltstong av den tynne, moderne typen. Andre lange og lette pinnar eller stenger kan også brukast.
Fremgangsmåte
Be deltakarane stille seg opp i to rekkjer med ansikta mot kvarandre. Dei strekker ut hendene og peikar på personen dei står overfor med begge peikefingrane.
Legg «heliumpinnen» (ei lang, tynn og lett stong) ned på peikefingrane til deltakarane, og be dei justere høgda dei held fingrane i, slik at pinnen ligg heilt vassrett.
Oppgåva
Forklar at målet er å senke heliumpinnen heilt ned til golvet/bakken. Reglane er:
– Alle peikefingrane må vere i kontakt med heliumpinnen heile tida.
– Det er ikkje lov å gripe om eller ta i pinnen med andre fingrar.
– Dersom ein peikefinger mistar kontakt med pinnen, må gruppa starte på nytt.
Gjennomføring
Set gruppa i gang. I starten vil pinnen typisk stige i staden for å søkke – noko som gjerne skaper latter. Du kan late som du er overraska og seie: «Kvifor løftar de pinnen? Det var jo senke han de skulle!»
Etter 5–10 minutt utan å lykkast kan gruppa begynne å gje opp. Då er det lurt å bryte inn med konkrete framlegg, eller be dei stoppe og diskutere ein felles strategi før dei prøver igjen.
Dersom gruppa løyser oppgåva for raskt: Ver ekstra streng med å påpeike fingrar som ikkje er i kontakt, og krev at pinnen blir senka heilt ned til bakken. Du kan også henge noko lett på kvar ende av pinnen – fell det av, er det omstart.
Til slutt vil gruppa forhåpentlegvis klare å roe seg ned, konsentrere seg og sakte, men sikkert, klare å senke heliumpinnen.
Diskusjon i etterkant
Bruk nokre minutt på refleksjon etter aktiviteten. Eksempelspørsmål:
- Kva var den fyrste reaksjonen då de forstod kva oppgåva gjekk ut på?
- Kor godt klarte gruppa denne utfordringa?
- Kva for ferdigheiter er nødvendige for å klare ei slik oppgåve?
- Kva for kreative løysingar kom de opp med? Korleis blei dei mottekne av dei andre?
- Kva ville ein utanforståande ha sett på som styrkar og svakheiter ved gruppa?
- Kva roller hadde dei ulike personane?
- Kva fekk kvar og ein av dykk ut av denne oppgåva?
- Kvar kan ein finne liknande situasjonar i kvardagen? (Både samarbeidsdelen og det som handlar om prestasjonspress.)
